कोतवाली मा करिस आत्मसर्मपण

जिला बांदा, ब्लाक बबेरू, गांव बदौली का मजरा क्योटरा। हेंया का बब्बू 29 जून का बबेरू कोतवाली मा पुलिस के सउहें आत्मसमर्पण कई दिहिस। काहे से वहिके उपर आपन औरत का गोली मार के हत्या करैं का आरोप रहै। पुलिस मउके मा पा के बब्बू का जेल भेज दिहिस है।

बबेरू ब्लाक के समगरा गांव का रहैं वाला रामसजीवन बताइस-“मैं आपन लड़की लक्ष्मी देवी के शादी बबेरू ब्लाक के गांव बदौली, मजरा क्योटरा के बब्बू के साथै 3 जून 2013 मा कीने रहौं। शादी के बाद ससुराल वाले चार पहिया गाड़ी मांगै लाग। मांग पूरी न होय मा लड़की के साथै मारपीट करैं करत रहैं। 28 जून का दिन ढ़ाई बजे मोहिका फोन कइके कहिन कि लक्ष्मी देवी बहुतै लड़ाई मचाये है तौ लिवाय जाव। मैं क्योटरा मा गांव के लोगन से फोन से पता करेंव तौ पता चला कि लड़की मर गे है। हम लड़की के ससूराल आवा। लड़की के माथा मा गोली लागे लाग रहै।

बब्बू का कहब है कि लक्ष्मी देवी घर मा रखा तमंचा से खुदै गोली मार लिहिस है। घटना के समय घर मा कोउ नहीं रहा आय।

बबेरू कोतवाली के दीवान रामलोचन का कहब है कि बब्बू के खिलाफ मुकदमा लिख गा है। मुकदमा मा धारा 498 ए (दहेज उत्पीडन) 304 (गैर इरादन हत्या) अउर 3/4 (दहेज के मांग करब) लाग हैं।