कोटेदार के खिलाफ दई दरखास

rasan wजिला महोबा, ब्लाक कबरई, गांव रतौली ई गांव के पचास आदमी बताउत हे की कोटेदार राशन नईं बांटत हे। पूरो राशन ब्लैक मे बेंचे को आरोप लगाउत हे।
घसीटा, रज्जन ओर जगदेव सिंह कहत हे की हमाये राशनकार्ड की पर्ची बनी हे। फिर भी कोटेदार राशन नईं देत हे। अगर हम कहत हे तो गाली गलौज करत हे। जीसे हमाओ परिवार भुखमरी के कगार मे आ गओ हे।
रामदास की ओरत उमा बताउत हे की मोओ राशनकार्ड नम्बर 296940134312 हे। मोये कोटेदार ने तीन महीना से राशनकार्ड मे रासन नई दओे हे। मे मेहनत मजदूरी करके आपन परिवार पालत हे। सूखा के कारन सोचत हते की अगर कछू कोटेदार से लाभ मिल जेहे तो ठीक रेहे। चुनुबादी बताउत हे की मोओ राशनकार्ड 296940134320 हे। परिवार मे पांच लोगन को परिवार हे। सूखा के कारन सब कछू बाजार से खरीदने परत हे। हम मजदूरी के भरोसे रोज की कमाई से पेट भरत हे। फिर भी कोटेदार हमे राशनकार्ड मे हमे राशन नईं देत हे। अगर हम कोटा राशन लेन जात हे तो भगा देत हे। 10 मई खा बीस आदमियन ने महोबा एस.डी.एम. खा लिखित दरखास दई हे। दई दरखास मे लिखो हे की कोटेदर कहत हे की अगर सब अनाज बांट देंहो तो अधिकारियन खा खर्चा किते से देहां।
कोटेदार दिलीप कुमार कोटा न बांटे की बात झूठी कहत हे। कछू आदमी चिढ़त हे जीसे झूठी दरखास देत हे।
महोबा एस.डी.एम. सुशील प्रताप सिंह कहत हे की दरखास मिली हे। ईखी जांच कराई जेहे। अगर कोटेदार सही पाओ अगाऊं तो कारवाही करी जेहे।

रिपोर्टर – सुनीता प्रजापति