किते लगवाये टीका

बन्द परो उपकेन्द्र
बन्द परो उपकेन्द्र

जिला महोबा, ब्लाक चरखारी, गांव अनघौरा। ई गांव में बनो पांच साल पेहले को उपकेन्द्र सालन से नई खुलो आय। जीखे कारन गर्भवती ओरतन खा टीका लगवायें खे लाने चरखारी सामुदायिक स्वास्थ्य केन्द्र जायें खा परत हे।
शिवचरण ओर कामता प्रसाद बताउत हे कि जा उपकेन्द्र लगभग 2008 में बनो हतो। जभे से साल छह महीना में एक दइयां खुल गओ तो खुल गओ। नई तो बन्द परो रहत हे। सुशीला बताउत हे कि जभे हमखा टीका लगवाये जाये खा होत हे, तो पचास रूपइया किराया लगा के चरखारी के सामुदायिक स्वास्थ्य केन्द्र जात हे। एसई शोभारानी बताउत हे कि जभे जा उपकेन्द्र बनो हतो तो बोहतई खुश भये हते कि अब हम लोगन खा चरखारी न जाने परहे, ओर कोनऊ भी परेशानी होहे तो एतई से सुलझ जेहे। पे उपकेन्द्र बने न बने खा कोनऊ फायदा नइयां। काय से केन्द्र कभऊं नई खुलत आय।
एडिशर्नल सी.एम.ओ डाक्टर बी.पी. वर्मा ने बताओ कि महीने के पहले बुद्ववार ओर शनिवार खा हर केन्द्र खुलत हे। ईखे बाद ए.एन.एम. प्लान के हिसाब से हर गांव में टीका करण करत हे। ई बीच अगर कोनऊ गर्भवती ओरत खा परेशानी हे तो 102 नम्बर डायल करे ओर चाहे जोन सरकारी अस्पताल चली जाय। ऊ गाड़ी खास गर्भवती ओरतन खे लाने हे। अगर महीना के पेहले बुद्ववार ओर शनिवार खा भी केन्द्र नई खुलत आय तो डिप्टी सी.एम.ओ. खा भेज के जांच कराई जेहे।