कस्बा के अन्दर से बसै निकरैं के मांग

बाई पास होइके निकर जात बस
बाई पास होइके निकर जात बस

जिला बांदा, ब्लाक तिन्दवारी, कस्बा चिल्ला। हेंया बांदा से कानपुर जाय वाली रोडवेज बसै चिल्ला बाजार होइके शाम 4 बजे से नहीं निकरत आय। महीनन से बाई पास वाली सड़क से निकरत हैं। यहिसे कानपुर के बाजार करैं वाले यात्रिन का परेशानी होत है। चिल्ला कस्बा के मड़ई 3 दिसम्बर 2013 का बांदा परिवहन विभाग अउर डी.एम. का दरखास दिहिन हैं।
चिल्ला कस्बा के बीरेन्द्र कुमार शुक्ला अउर राजेश बतावत हैं कि जबै से बाई पास सड़क बन गे तबै से हमका बहुतै परेशानी है। यहिके खातिर हम सन 2011 मा भी डी.एम. का दरखास दीन रहै। तबै उंई बसै चिल्ला बाजार से होइके जाय लागी रहैं। बसैं कहां जात हैं यहिके देख-रेख खातिर एक टी.आई. भी चिल्ला खातिर रखा गा रहै, पै 4 बजे से टी.आई. नहीं बइठत आय। रात-बिरात कानपुर या बांदा से यात्रिन का सामान लइके आवैं मा परेशानी होत है। सबै बसै रातौ दिन चिल्ला बाजार होइके निकरैं।
परिवहन विभाग के बाबू अरिमर्दन सिंह का कहब है कि बांदा से कानपुर खातिर 39 बसै चलत हैं। चिल्ला बाजार के अन्दर से बसैं जाय के देख रेख खातिर एक टी.आई. रखा गा है। जेहिसे बसै कहां से होइके जात हैं यहिके जानकारी मिल सकै। अगर टी.आई. नहीं बइठत तौ ए.आर.एम. से फोन कइके कही दीन जई।