कम जगह में भी सफल ऑपरेशन

md1
कतार में बईठल महिला

जिला सीतामढ़ी, प्रखण्ड सोनबरसा, प्राथमिक स्वास्थ्य केन्द्र में 10 दिसम्बर 2013 के परिवार नियोजन (ऑपरेशन) कैल गेलई। लेकिन ओई अस्पताल के स्थिति दयनिय हई।
ऑपरेशन करावे आयल महिला सुशीला देवी, गीता देवी कहलथिन कि हमरा आशा कार्यकर्ता ललथिन ह। लेकिन इहां ऐई ठंडा में रहे के साधन न हई। अस्पताल के छत त टुटल हई। आई रात भर हम सब केहुना रह जबई। आशा कार्यकर्ता रामसती देवी, शोभा देवी, रेखा देवी सब कहलथिन कि हम सब बहुत प्रेरित कके मरीज के लबई छी। लेकिन इहां रहे के साधन न हई। प्रखण्ड कार्यालय में केहु तरह पोरा बिछाके लोग सब रात काटई छथिन। कुछ दिन ऑपरेशन बंद रहलईह, आई फेर शुरू कैल गेलई ह। हमरा सब के एक ऑपरेशन पर डेढ़ सौ रूपईया मिलई छई। ओकरा बाद परिवार नियोजन के लेल सहयोग राशि छौ सौ रूपईया। अउर पुरूष बंध्याकरण पर ग्यारह सौ रूपईया मिलई छई।
डॉक्टर निर्मल कुमार कहलथिन कि अभी मरीज बहुत अवई छथिन लेकिन जगह के कमी से बीस महिला के ही ऑपरेशन कैल गेलईह। आशा प्रभारी सर्वानंद पाण्डे कहलथिन कि कम जगह रहे के बाद भी केतना साल से डॉक्टर निर्मल कुमार द्वारा सफल ऑपरेशन करायल जाई छई।