कभे बनहे बाउन्ड्री

बाउन्ड्री बिना जा हालत
बाउन्ड्री बिना जा हालत

जिला महोबा, ब्लाक पनवाड़ी, गांव फदना को मजरा नौगांव। एते को प्राथमिक स्कूल लगभग दस साल को बनो आय, पे ऊमे बाउन्ड्री बनवाये खे लाने कोनऊ अधिकारी ध्यान नई देत आय।
स्कूल में पढ़े वाली प्रीती ओर शालिनी ने बताओ कि हमाये स्कूल में बाउन्ड्री नइयां। जीसे हम खेल नई पाउत आय। काय से एतई से ट्रैक्टर ओर मोटर साइकिल निकरत हें। जोन पेड़ लगाउत हें कि हमाओ स्कूल नींक लगन लगे तो ऊखे भी जानवर टोर देत हें। प्रभा बताउत हे कि हमाई प्रार्थना भी बाहर खुले मैदान में होत हेे।
हेड मास्टर अत्रूप सिंह ओर सहायक अध्यापिका प्रवेश कुमारी ने बताओ कि हमाये स्कूल में चउवन बच्चा हें। बाउन्ड्री बनवाये खे लाने एक साल पहले हमने महोबा में बेसिक शिक्षा विभाग में दरखास भेजी हती। तभई विभाग वाले बाउन्ड्रीकी नाप ले गये हते, पे अभे तक जा सुनवाई नइयां कि बाउन्ड्री कभे तक बनहे।
उप बेसिक शिक्षा अधिकारी वी.एस. तिवारी ने बताओ कि ओते की दरखास आई हती। बाउन्ड्री बनवाये खे लाने शासन खा प्रस्ताव भेज दओ हे। चुनाव के बाद ऊ स्कूल में बाउन्ड्री बनवा दई जेहे।