कबै पूर होइ आर.सी.सी.

शुरू हवै काम
शुरू हवै काम
ठेकेदार अनिल कुमार
ठेकेदार अनिल कुमार

जिला चित्रकूट, ब्लाक कर्वी, कस्बा कर्वी। हिंया के बस स्टाप लगभग पन्द्रह बरस से खराब परा हवै। या कारन यात्रीयन अउर बस वाले का बहुतै परेशानी उठावै का परत हवै। साथै अगल बगल के दुकानदार का परेशानी उठावै का परत हवै। या कारन कइयौ दरकी परिवहन विभाग अउर आम मड़ई डी.एम. अउर नगर पालिका पत्रकार से शिकायत करिन हवैं। या से अक्टूबर 2013 से बस स्टाप बनै लाग हवै।
रोडवेज ड्राइवर अवधेश अउर कन्डेक्टर रमेश का कहब हवै कि बीस दिन होइगा हिंया आर.सी.सी बनत, पै अबै तक नहीं बन पाई आय। या कारन बस ठाढ़ करै मा बहुतै परेशानी उठावै का परत हवै। 10 अक्टूबर 2013 का तौ बस अउर बिजली के खम्भा मा टक्कर लागै से बिजली के तार टूट के गिरै लाग या से यात्री घबरा गें।
लाला होटल वाले का कहब हवै कि बस स्टाप मा हर समय धूल उड़त रहत हवै। यात्री मड़ई समान नहीं लेत काहे से धूल उड़ के परत हवै। आर.सी.सी बन जात तौ सबै का नींक होइ।
ठेकेदार अनिल कुमार का कहब हवै कि अक्टूबर से बनब शुरू भा हवै। यहिका नगर पालिका कइती से

बनावा जात हवै। तीस लाख रूपिया बजट पास भा हवै।
कर्वी नगर पालिका के जेई संतोष सिंह राठौर का कहब हवै कि बस स्टाप डी.एम. के आदेश से आर.सी.सी. बनवावा जात हवै। यहिका बजट चालिस लाख रूपिया पास भा हवै। अउर ठेका से बनवावा जात हवै दिसम्बर 2013 तक बन जई।