ऐके जमीन पर केतना के कब्जा

jamini
खाली परल जमीन

जिला सीतामढ़ी, प्रखण्ड सोनबरसा, पंचायत रजवाड़ा पश्चिमी, गांव चिलरा। उहां जमीन के लेके विवाद बहुत दिन से चल रहल हई। छौ कट्ठा के प्लौट के केतना आदमी खरीद बिक्री कैले छथिन। ओई जमीन के अपना-अपना कब्जा में करे के लेल दुनु पार्टी के लोग के 27 मार्च 2014 के आपस में झगड़ा भेलई। जेई के लेल दुनु तरफ से केश भेल हई।
ओई जमीन के पहिला खरीदार राधा कृष्ण प्रसाद अउर उनकर पत्नि सुदामा देवी कहलथिन कि ऐई जमीन के बहुत पुराना केश हई। उहां के कपिलदेव प्रसाद के लड़का तोता राम शारिरीक विकलांग अउर मानसिक कमी रहई। दुनु बाप बेटा के मरला के बाद उनकर पत्नि दोसर शादी कर लेलथिन अउर ओही जमीन के उनकर रिस्तेदार लालबाबू गांव के वर्तमान मुखिया के पति पपु उर्फ अशोक जमीन से रसीद लेलथिन अउर चार आदमी के हाथे बेच देलथिन। लेकिन हम न जनली। हम ओई खेत में मसूरी केरईया बोयले रही लेकिन दोसर पार्टी भोला राम अउर पत्नि सिकिन्दरी कहलथिन कि उ हमर जमीन हई हम अपन जमीन खाली करे गेली तब झगड़ा भेलई।
सोनबरसा थाना के पुलिस सुरेश पासवान कहलथिन कि दुनु तरफ से केश भेल हई। जेकर कांड संख्या 41-42/2014 हई। छान बिन चल रहल हई कि कागजाती साबूत में किनकर जमीन हई।