एक्सीडेंट से फूटत बची आंख

अस्पताल में बलवीर
अस्पताल में बलवीर

जिला महोबा, ब्लाक पनवाड़ी, गांव बागौन। एते के रामकृपाल यादव के लड़का बलबीर खा पी.डब्लू.डी. विभाग (छतरपुररोड) खे सामने 3 अप्रैल 2014 खा मार्शल से एक्सीडेंट भओ हे। ईखी सूचना महोबा कोतवाली में दई हे, पे पुलिस ने कोनऊ कारवाही नई करी आय।
रामकृपाल ने बताओ कि मोये नाती नीलेश की चार दिन से तबियत खराब हती। जीखी दवाई कराये महोबा खे सरकारी अस्पताल में आये हते। नीलेशा खा छतरपुर खे लाने रिफर कर दओ हतो। हमाये रूपइया न हते तो फोन करके अपने लड़का बलबीर से रूपइया मंगाओ हतो। जभे बलबीर रूपइया देके बागौन अपने गांव जात हतो। तभई श्रीनगर केती से एक मार्शल तेजी से आई ओर बलबीर खे मोटर साइकिल में धक्का मार दओ। जीसे मोये लड़का खे सिर में चोट लग गई ओर आंख में बोहतई चोट आई हे। मेंने तुरतई महोबा कोतवाली में सूचना दई हे। जीमें पुलिस वालेन ने मार्शल खा पकर लओ हे, पे मार्शल को ड्राइवर ओर आदमी सब भाग गये हें।
जभे कि महोबा कोतवाली के एस.एस.आई. भास्कर मिश्रा से ई मामले में पूछतांछ करी तो ऊने बताओ कि मार्शल ओर आदमी सब फरार हें। अभे रामकृपाल ने रिपोर्ट नई लिखाई आय। अगर ऊ रिपोर्ट लिखाहे तो आगे कारवाही होहे।