उपस्वास्थ्य केन्द्र बना नाम कै?

जिला फैजाबाद, ब्लाक मया, ग्रामसभा, समन्था। हिंआ लगभग दस साल से उपस्वास्थ्य केन्द्र बना बाय। अबहीं तक डिलेवरी कै सुविधा नाय भै बाय। जेसे मनइन का काफी दिक्कत बाय।

गीता देवी, रिंकी शेषमणि बताइन कि ई केन्द्र तौ खाली नाम कै बना बाय। पर ए.एन.एम. पूर्व माध्यमिक विद्यालय मा टीका करण कराथिन। प्रशव मया सी.एच.सी. पै करावाथिन। अउर लिखित मा उपस्वास्थ्य केन्द पै काम भै देखाय दियाथिन। उपकेन्द्र पै यतनी गन्दगी बाय कि एकौ मिनट खड़ा नाय होय जात। सब खिड़की दरवाजा टूटा पड़ा बाय। कमरा के भीतर मा पैरा भूसा बालू कोने-कोने रखा बाय। हिंआ ए.एन.एम. नाय रहतिन यहि लापरवाही के नाते बेकार भै बाय। वहीं बाकरगंज उपस्वास्थ्य केन्द्र पै सब सुविधा उपलब्ध बाय। लकिन हिंआ कउनौ सुविधा नाय बाय।
सिकरेट्री राजेन्द्र प्रसाद बताइन कि हम बीसन बार ताला मंगवाय के लगवायन तौ खिड़की तूर डालाथिन। एक तौ ई जगह बहुत सूनसान बाय। हिंआ एक महिला कै रहब उचित नाय बाय।

ए.एन.एम. शारदा बताइन कि डिलेवरी प्वाइंट घोषित नाय भै बाय। बाकी टीकाकरण बैठक कराई थी। यकरे मरम्मत अउर साफ सफाई के ताई छह महीना हुवत बाय मांग करे हई।