उपकेन्द्र बने नइयां कोनऊ फायदा

बन्द रहत उपकेन्द्र
बन्द रहत उपकेन्द्र

जिला महोबा, ब्लाक कबरई, गांव पचपहरा। एते पूर्व प्रधान पूर्णमा सिंह के समय उपकेन्द्र बनो हतो। जोन अभे तक नई खुलत। ए.एन.एम. दो-दो महीना नई आउत हे।
कमला ओर सुरतिया बताउत हंे कि गंाव में ए.एन.एम. केन्द्र बनो हे, पे ए.एन.एम. समय से नई आउत हे, न टीका करन हो पाउत हे। एई से छोट-छोट बच्चा, गर्भवती ओरतन खा टीका लगवाउन ओर कोनऊ जांच या सलाह लेने हे तो किराया लगा के गरीब आदमी मटौंध या फिर बांदा के सरकारी अस्पताल जात हें। डिलेवरी के समय बोहतई परेशानी होत हे। सरकार लाखन रूपइया गांव में विकास ओर सुविधा खा खर्च करके केन्द्र तो बनवा दओ हे, पे ऊखो उपयोग नई होत हे। जभे हमाये एते केद्र बनो हे, ओर ए.एन.एम. भी चयनित हे, तो केन्द्र काय नई खुलत हे। एई से हम सोचत हें कि हमाये एते को केन्द्र समय से खुलन लगे तो नींक हो जेहें।
पंचायत मित्र लतीफ खान ने बताओ कि ए.एन.एम. बहुत कम आउत हे। जभे कि बुधवार ओर शनिवार खा केन्द्र खुले को नियम हे, पे दो-दो महीना में केन्द्र खोलत हे। अगर हम कछू कहत हंे तो कोनऊ न कोनऊ बहाना बना लेत हे।
कबरई सामुदायिक स्वास्थ्य केन्द्र के अधीक्षक जी.आर. रथमेले ने बताओ कि ओते कि ए.एन.एम. दो महीना से मेडिकल छुट्टी में चलत हे। जीसे उपकेन्द्र बन्द रहत हे। स्टाप की कमी होंय से ओते कोनऊ ए.एन.एम. ओर आशा बहू नई जा पाउत हें।