आंगनबाड़ी जुलूस निकाल के करिन प्रदर्शन

taza-pez--webजिला बांदा। अखिल भारतीय आंगनबाड़ी करमचारी महांसघ अशोक लाट तिराहे से जुलूस निकाल के प्रदर्शन अउर नारेबाजी करत 8 मार्च का आपन ग्यारह सूत्री मांगन का लइके सैकड़न आंगनबाडी जिलाधिकारी का ज्ञापन सौपिन हैं। धरना का नेतृत्व मण्डल अध्यक्ष नीलम वर्मा करिन। जेहिमा उंई मुख्य सेविकन के सब खाली परे पदन मा कार्यकत्रियन के जल्दी पदोन्नति करैं के मांग करिन हैं।
आंगनबाडी कार्यकर्तन के जरिए 8 मार्च का महिला दिवस के दिन महां आक्रोश दिवस मनाइन अउर सैकड़न के तादात मा आंगनबाडी एक जुट होइके संकट मोचन मदिंर के पास से कलेक्ट्रेट पहुंची अउर जम के नारेबाजी अउर प्रदर्शन करिन। जेहिसे पूरा कलेक्ट्रेट गूजं उठा। आंगनबाड़ी के मण्डल अध्यक्ष नीलम वर्मा केन्द्र सरकार का चुनौती देत कहिन कि हमार ग्यारह सूत्री मांग पत्र सरकार गंभीरता से ले। अगर हमार मांग पूर न होई तौ देश कि लाखन आंगनबाड़ी कार्यकत्री जन्तर मन्तर मा आमरण अनशन अउर धरना प्रदर्शन करिहैं। प्रधान मंत्री मोदी अच्छे दिन आवैं का सपना देखा के देश के सत्ता तौ हांसिल करैं वाला मोदी स्वंय एक दिन कहत रहै कि सरकार तौ हम चलाइत हन, पै देश आंगनबाड़ी चलावत हैं, पै अब अच्छे दिन के बजाये बुरे दिन का सड़यन्त्र रचत है। 2016-17 के बजट सत्र मा आंगनबाडि़न का केवल निराशा ही हांथ लाग है। यहिसे हमार मांग है कि मिनी आंगनबाड़ी का भी सामान मानदेय मिलै। मुख्य सेविका अउर लिपिक के सब पदन मा आंगनबाड़ी कार्यकर्तन के पदोन्नति करै अउर सीधी भर्ती बंद कीन जाय। यहिनतान से सब करमचारिन का शासकीय करमचारी का दर्जा भी दीन जाय। आगनबाड़ी हरियाण, गुजरत, केरल,मध्य प्रदेश अउर उत्तरांचल का हवाला देत कहिन कि हम लोगन का भी होंआ के जइसे मानदेय अउर सुविधा मिलैं। या धरना के पूरी अगुवाई जिलाध्यक्ष बांदा किरन सेठी अउर महामंत्री रजनी अउर मरजीना करिन। जेहिमा बांदा जिले के 8 ब्लाकन के आंगनबाड़ी शामिल रहै। ए.ड़ी.एम.डी.एस. पाण्डेय का कहब है कि उनका ज्ञापन जल्दी ही मुख्यमंत्री के पास भेजा जई।