अन्त्योदय कार्ड धारकन के सूखा राहत किट वाली सूची मा नहीं नाम

जिला बांदा, ब्लाक नरैनी, गांव नसेनी। हेंया के वार्ड नम्बर 70 के वार्ड सदस्य कुसुम अउर गांव के गीता का आरोप है कि सूखा राहत के तहत अन्त्योदय कार्ड धारकन का बंटैं वाले किट के लिस्ट मा गांव का कोटेदार हम लोगन के नाम नहीं चढ़ाइस आय। यहिसे हम लोग 18 अप्रैल का नरैनी एस.डी.एम.का दरखास दीन है।
कुसुम अउर गीता का कहब है कि हमरे पास एकौ बिसुवा जमीन निहाय। हम गरीब मजदूर आहिन। मेहनत मजदूरी से कउनौतान आपन गुजर करित हन अउर 10 साल से हमार अन्त्योदय राशन कार्ड भी बना है। गांव मा 17 अप्रैल का रविवार के दिन अन्त्योदय कार्ड धारकन का सूखा राहत किट का सामान बांटा गा। मुख्यमंत्री कइत से गरीबन खातिर सेत मा दें के घोषणा कीन गे रहै, पै वा लिस्ट मा कोटेदार हमार नाम नहीं चढ़वाइस आय। जबैकि हम लोग दुई दुई दरकी कोटेदार का अपनी फोटो दई चुके हन। यहिसे हम लोग एस.डीएम. का दरखास दइके नाम चढ़वावैं के मांग कीन है।
कोटेदार बिल्लू का कहब है कि लगभग 10 लोग रही गे हैं। जेहिका नाम लिस्ट मा निहाय। बांकी के 60 लोगन के लिस्ट तैयार है अउर उंई लोग आपन फोटो नहीं दिहिन आय।
सप्लाई इस्पेक्टर याकूब खां का कहब है कि कोटेदार से कहिके नाम चढ़वा दीन जई अउर किट भी देवावा जई।