जिला महोबा, ब्लाक जैतपुर, कस्बा कुलपहाड़ बस स्टैण्ड पूछतांछ आफिस मे पन्द्रह दिन से कोनऊ नइयां। जीसे यात्रीयन खा आयें जाये में परेशानी होत हे। काय से बस को समय बतायें वालो कोनऊ नइयां।
रानू ओर जयकिशोर बताउत हे कि एते दर्जनन बसे चलत हे। पेहले एते बाबू बेठत हतो। अब पन्द्रह दिन से कोनऊ नई बेठत हे। आफिस में ताला लटकत हे। अगर कोनऊ सवारी आउत जात हे तो भटकत रहत हे जा फिर दुकान दारन से पूंछत हे। कोनऊ बताउत हे कोनऊ डांट के भगा देत हे। सुगिरा गांव को जगदीश ओर भटेवर कला की आरती कहत हे कि हम दो घण्टा से राठ बनारस वाली बस के इन्जार में बेठे हे। कोनऊ नई बताउत हे कि कभे तक आहे। हर बस स्टाप में कोनऊ न कोनऊ रहत हे जीसे बस की इन्ट्री होत हे। ओई सवारियन खा बस को समय बताउत हे।
महोबा सुनील शर्मा कहत हे कि महोबा बस स्टाप तोड़ के नओ बनवाओ जात हे। जीसे एते चैकीदारन की बोहतई जरूरत हे। स्टाप की कमी हे। कुलपहाड़ के बाबू की डियूटी महोबा में लगा दई हे। हमने छह पी.आई.डी कर्मचारियन की मांग करी हे। जभे आ जेहे तो कुलपहाड़ में एक बाबू की डियूटी लगा दई जेहे।