कुटरा गांव के आदमी, चेक खा लगाये आसरो
जिला महोबा, ब्लाक जैतपुर, गांव बुधौरा को मजरा कुटरा। एते दर्जनन किसानन को आरोप हे पिछले साल के ओलावुष्टि ओर बारिस से भओ नुक्सान को मुआवजा आज तक नई मिलो हे। जभे की हर गांव में पिछले साल की चेक बाट दई हे। एई से आदमियन ने 21 अपै्रल खा तहसील में हंगामा करो हे।
रामचरन, मइयादीन, बल्दु सुन्दरलाल के साथे दर्जनन किसानन नेे कहो की हम लोग एक-एक दिन के खाना खा मोहताज हे। सरकार पिछली साल ओर ई साल की भी चेक भेज दई हे। हमाये आस-पास के गांवन की चेक मिल गई हे, पे हमाई आज तक चेक नई मिली हे। अभे तक हमाये गांव को लेखपाल अश्वासन देत हतो की तुम्हाई चेक मिलहे। हम ऊखो दूसरे गांव में ट्रान्सफर हो गओ हे। एई से हम तहसील में आके अपने मुआवजा की मांग करी हे।
कानूनगो महेन्द्र खरे बताउत हे ई गांव की लिस्ट नई बनी हती। जीसे मुआवजा नई मिलो हे। अब सबके नाम लिस्ट बनाई जात हे तो मुआवजा दओ जेहे।
चेक बंटे के बाद हमाई नई मिली
एसई मवइया गांव के प्रकाश, जालिम सिंह ओर गोपाल को आरोप हे हमने तीस साल पेहले गांव नन्दलाल की जमीन साढ़े इक्कीस बीघा खरीदी हती। जोन ई साल हमने ओई नन्दलाल खा बाटांई के दये हते। हमाये गांव में डी.एम. के द्वारा 20 मार्च खा चेक बांटी हे। पे हमे नई मिली हे। एई से हमने कुलपहाड़ तहसील में एस.डी.एम. से कहो हे।
कुलपहाड़ एस.डी.एम. मुहम्मद रिजवान ने बताओ कि ऊ जमीन में मुकदमा चलत हे। दोनऊ जने खा बुलाओ हे। जीखे नाम जमीन हो हे। ओई खा चेक दई जेहे।