पुलिस कहिस कसत लिखन रपट

जिला बांदा, ब्लाक तिंदवारी, कस्बा तिंदवारी, मोहल्ला रामनगर। हेंया 19 मार्च के रात जूली आटो गैरेज मा आगी लागै से दुकान जल के राख होइगे। दुकानदार ताराचन्द्र का आरोप है कि ढाई लाख रूपिया का सामान जल गा है।
ताराचन्द्र बतावत है-“मैं 19 मार्च का शाम 8 बजे दुकान बंद कइके घर चला गये रहौं। 20 मार्च का सुबेरे 10 बजे दुकान खोलैं आयेंव तौ जली दुकान देख के हैरान रहि गयेंव। मोटर साइकिल मरम्मत के दुकान करे रहौं। टायर ट्यूब, मोटर साइकिल रिपेरिंग का सामान अउर एक मोटर साइकिल समेत ढ़ाई लाख का सामान जल गा। पता नहीं आगी कसत लाग कउन लगावा कउनौ पता निहाय। तिंदवारी थाना मा रपट करैं गयेंव तौ पुलिस रपट नहीं लिखिस।
तिंदवारी थाना का दीवान कमल प्रसाद का कहब है कि वा मामला के सूचना आई है। जांच कीन गे है। आगी लगावैं वाले का कउनौ पता निहाय तौ रपट कसत लिखन। रपट लिखैं खातिर नाम पता जरूरी होत है।