पहाड़ के खदान मा आय दिन घटत घटना

जिला चित्रकूट, ब्लाक कर्वी, गांव रौली कल्याणपुर। हिंया के रहैं वाले राकेश का आरोप हवै कि छोट भाई दिलीप उर्फ लाला के 21 फरवरी का बजनी पहाड़ मा ब्लास्टिंग होय से मउत होइगे अउर परिवार का रमेश बहुतै ज्यादा चोंटा गा हवै। यहिके रपट कर्वी कोतवाली मा 22 फरवरी का लिखाइगे, पै अबै तक पुलिस कउनौ कारवाही नहीं करिस आय।
राकेश कहत हवै कि बजनी पहाड़ का ठेका इन्द्रप्रसाद लीने हवै। हमार चाचा मोती वहिके खदान मा काम करत हवै। वहिका खाना दें मोर भाई दिलीप उर्फ लाला गा रहै। वा खदान मा खेलैं लाग। 21 फरवरी का दिन मा लगभग साढ़े पांच बजे बजनी पहाड़ के खदान मा बहुतै जोरदार ब्लास्टिंग भे। दिलीप मर गा अउर परिवार के रमेश के चोंट लाग हवै। वहिका जानकीकुंड अस्पताल मा भर्ती कीन गा। हुंवा के डाक्टर इलाहाबाद का रिफर कइ दिहिन।
बजनी पहाड़ के खदान मालिक इन्द्रप्रसाद से बात करैं खातिर कइयौ चक्कर लगायेगें, पै वा नहीं मिला। वहिके बेटवा सोमप्रकाश का कहब हवै कि मोर बाप इन्द्रप्रसाद जिला से बाहर नेउते मा गा हवै।
कर्वी कोतवाली के मुंशी उग्रेश त्रिपाठी का कहब हवै कि खदान मालिक इन्द्रप्रसाद के खिलाफ 304 (गैर इरादतन हत्या), एस.सी.एस.टी. एक्ट लाग हवै। या मामला के जांच चलत हवै।
खनिज अधिकारी प्रमोद कुमार सिंह का कहब हवै कि ब्लास्टिंग के जांच कराई जई। आखिर कउन इनतान के घटना का अंजाम दिहिस हवै। या बात का पता लाग जई तौ आगे वकहिे खिलाफ कड़ी कारवाही कीन जा सकत हवै। काहे से कि बेकसूर दिलीप उर्फ लाला के मउत भे हवै।