खबर लहरिया बुंदेलखंड मांस मण्डी हटवायें की मांग

मांस मण्डी हटवायें की मांग

महोबा शहर, आल्हा चैक। एते 25 फरवरी 2015 से हिन्दु युवा वाहिनी वाले शहर के बीच से मांस मण्डी हटवाये खे लाने क्रमिक अनशन खा आमरण अनशन कर दओ हे। साथे चेतावनी दई की जभे मांस मण्डी खा बीच शहर से बाहर न करी जेहे तभे तक अनशन रेहे।
हिन्दू युवा वाहिनी के आशीष महाराज, भरतलाल, अजय ओर मयंक ने बताओ कि हमने केऊ दइयां डी.एम. एस.डी.एम. ओर नगर पालिका मे दरखास दे चुके हे। जीसे बीच शहर से मांस मंण्डी हटवाई जाये। काय से ऊ तहसील कोतवाली ओर बाजार जाये को मेन रास्ता मे हे। दिन भर मे हजारन आदमी निकरत हे।
नीरज रावत, सतेन्द्र गुप्ता ओर जय शंकर भदौरिया ने कहो कि बकरे ओर मुर्गा खा काट के खुले में टांग देत हे। नालियन से खून बहाओ जात हे। जीसे आदमियन खा निकरब मुश्किल परत हे।
विश्वनाथ नगायच ओर अवधेश बताउत हे की महोबा में संक्रामक बिमारी ज्यादा होत हे। सुबेरे से बच्चा स्कूल जात हे। हमने 2002 से दरखास देत हे पे आज तक कोनऊ सुनवाईनई भई आय हमने ग्यारह हजार आदमियन के दसख्त करा हाईकोर्ट मे दई हती। महोबा तहसीलदार गुलाब सिंह ने बताओ कि जा जिम्मेंदारी नगर पालिका की आय। काय से ओई दुकानन को टैक्स लेत हे।
महोबा नगर पालिका परिषद के चेयनमैन पुष्पा अनुरागी ने बताओ कि मांस मण्डी हटवायें के लाने सासन के एते केऊ दइयां लिख के प्रस्ताव भेजो हे, ओते से आदेश आ जेहे तो मण्डी हटवा दई जेहे।