खबर लहरिया ताजा खबरें बेकार परल उपस्वास्थ्य केन्द्र

बेकार परल उपस्वास्थ्य केन्द्र

स्वास्थ्य केन्द्र में कर्मी न

स्वास्थ्य केन्द्र में कर्मी न

जिला सीतामढ़ी, प्रखण्ड, पंचायत इंदरवा, गांव नरकटिया। उहां लगभग पंद्रहो साल से बनल उपस्वास्थ्य केन्द्र बेकार परल हई। न ओकर सफाई होई छई अउर न उहां स्टाफ बईठई छई। लोग इलाज के लेल सोनबरसा पी.एच.सी. में अबई छथिन।
उहां के अनिल कुमार साह, अरबिन्द कुमार, सुशीला देवी कहलथिन कि उहां बेकार में सरकारी रूपईया फस गेलई। जब ऐई में डाॅक्टर नर्स न हई त कयला बनलई। इ उपस्वास्थ्य केन्द्र भूत बंगला बनल हई। जहिया इ केन्द्र बनलई तहिया मरीज के एक साल तक के इलाज, टीकाकरण अउर आॅपरेशन भी भेलई। ओकरा बाद ओकरा बाद से परता परल हई। हमरा सब के पंद्रह किलो मीटर दूर सोनबरसा जाये परई छई। इहां पर व्यवस्था हो जतियई त दूर न जाये के होतियई।
ए.एन.एम. सोमारी देवी कहलथिन कि इहां हम अकेला छी त टीका में ही आंगनवाड़ी सेन्टर पर जाये परई छई। जेतना केन्द्र हई ओही में समय लाग जाई छई। त हम उप स्वास्थ्य केन्द्र में केना जईयई। हमरा से की होतई उहां दोसर स्टाप भी चाही।
स्वास्थ्य प्रबंधक विनय भूषण कहलथिन कि स्वास्थ्य विभाग में स्टाप के बहुत कमी हई। जेई कारण सब जगह डाॅक्टर, कम्पाउन्डर न रख पवई छी। सरकार बहाली करथिन त जहां भी उप स्वास्थ्य केन्द्र बनल हई सब जगह के चालू हो जतई।