खबर लहरिया औरतें काम पर नौकरी लागे के बाद करत तीन लाख रूपइया की मांग

नौकरी लागे के बाद करत तीन लाख रूपइया की मांग

पुष्पा

पुष्पा

जिला महोबा, ब्लाक कबरई, कस्बा बेलाताल। एते के पुष्पा की शादी झांसी जिला के धवाकर गांव मे बृजेन्द्र के साथे भई हती। जीखी अब रेलवे विभाग मे नौकरी लागे से अब ऊ पुष्पा से तीस हजार रूपइया मांगत हे। न देय पे पुष्पा के साथे 3 अक्टूबर 2014 खा मारपीट करी हे। लड़की छुड़ा के भगा दओ हे।
पुष्पा को भाई उमाशंकर ने बताउत हे कि शादी में पचास हजार रूपइया ओर साइकिल दई हती। अब बृजेन्द्र अपने बाप किशोरीलाल के बदले मे नौकरी करन लगो हे। जीसे हमाई बहन के साथे मारपीट करत हे। पुष्पा ने कहो कि 3 अक्टूबर खा बृजेन्द्र मोसे कहन लगो कि मायके से तीन लाख रूपइया काय नई लाउत हे। जभे मेने गरीबी बताई तो ऊ मोय गाली गलौज करन लगो। मेंने अपने भाई खा फोन करके बुलाओ तो ऊखे भी बन्दूक से मारे की धमकी देत हते। जभे भाई मोये लिवा के आउन लगो तो मोई एक तीन साल की ओर एक तीन महीना की लड़की खा छुड़ा लओ। कहत हतो कि जभे तीन लाख रूपइया हो तभई एते आये नई तो न आये। एई से हमने ओते की पुलिस खा रजिस्ट्री कर दरखास भेजी हे।
आदमी बृजेन्द्र ने बताओ कि पुष्पा मायके जायें खा कहत हती तो मेने दीपावली के बाद जायें खा कहो तो ऊ नई मांनी। मेने सोचो की लड़की न देहों तो शायद पुष्पा आपने मायके न जेहे। एई से लड़की न दई हती। पे 14 अक्टूबर खा जाके गलती मना लई हे। लड़की खा ओतई दे आओ हों, दीपावली के बाद पुष्पा खा लिवा लाहों।