शराब पी के करत गाली-गलौज

जिला महोबा, ब्लाक चरखारी, गांव चंदौली। एते की रानी पत्नी पित्रपाल के साथे गांव के ही रामफल ने 21 सितम्बर 2014 खा रात 8 बजे शराब पी के गाली-गलौज करी हे। ईखी दरखास रानी ने 22 सितम्बर खा खरेला थाने में दई हे।
रानी ने बताओ कि मोये आदमी खा मरे सात हो गये। मोये दो लइका हें। ऊ अपनी बड़ी बहन के एते पढ़त हें। में घर में अकेली रहत हों, पे रामफल के मारे में रहें नई पाउत हों। आये दिन शराब पी के मोये साथे गाली-गलौज करत हे। अगर रात-बिरात में अपने घर में सो जात हों तो मोये घर में टार्च लगाउत हे। 21 सितम्बर खा रामफल, पसमी, पप्पू ओर चुनटाई मोये द्वारे में बेठ के शराब पियत हते। मेंने मना करी तो गली-गलौज करन लगे। लड़ाई सुनके मोओ भतीज बालेन्द्र आओ तो ऊखे 82 हजार रुपइया नगद ओर सोने की मंखी रामफल ने निकार लई। रामफल बताउत हे कि बालेन्द्र ने पेहले पसमी ओर पप्पू खा मारो हे। तभई गाली-गलौज भओ हे। रानी हमाये ऊपर झूठो आरोप लगाउत हे।
खरेला थाने के हेड कास्टेबिल प्रोन्नतिमान सुरेश मिश्र ने बताओ कि मामले की जांच कराई जेहे। बाद में कारवाही करी जेहे।