जिला महोबा, ब्लाक कबरई, गांव ग्योड़ी। एते की दलित ओरत भागवती को कहब हे कि ऊखे साथे गांव को बद्री गुप्ता ओर ऊखे तीन लड़कन ने 11 सितम्बर 2014 खा मारपीट करी। भागवती रिपोर्ट लिखाये खे लाने दिन भर खन्ना थाने में बेठी हती, पे रिपोर्ट नई लिखी गई हे। भागवती ने 12 सितम्बर खा रिपोर्ट लिख कारवाही की मांग खे लाने एस.पी. रामकिशोर खा दरखास दई हे।
भागवती ने बताओ कि गांव को बद्री ओर ऊखे लड़का खड़ण्जा उखाड़ के रास्ता में आपन घर बनाउत हते। जीसे मोये निकरे खा जघा न रेहे। एई से मेंने मना करो कि रास्ता मे घर न बनाओ। एई बात खा लेके बद्री ओर ऊखो लड़का मुल्लू मोये गाली-गलौज करन लगे। जभे मेंने मना करो तो ऊ सब मिल के मोये घर के भीतर घसीट के ले गये। भागवती की दरखास के अनुसार बद्री गुप्ता ओर ऊखे तीनऊ लड़कन ने ऊखे लात, घंूसा ओर हथौड़ा से मारो हे। जीसे ऊखी खोपड़ी फट गई हे। हाथ-पांव ओर छाती मे बोहतई गहरी चोट आई हें। दरखास मे खन्ना थाने मे रिपोर्ट लिखा के कार्यवाही करें की मांग भी करी गई हे।
खन्ना थाने मे बात करें पे थाने के एस.ओ. नन्दलाल भारती ने कहो कि पेहले बद्री गुप्ता रास्ता में घर बनाउत हतो। तभई हमने जाके मना कर दओ हतो। अब बद्री अपने जमीन में घर बनाउत हे। एस.ओ. के अनुसार भागवती ने अपने से पत्थर मार के अपनी खोपड़ी फोड़ लई हे। एई से ऊखी रिपोर्ट नई लिखी गई हे।
12 सितम्बर खा महोबा एस.पी. रामकिशोर ने भागवती खे दरखास जमा कर लई हे। ऊने खन्ना थाने में भी केस के बारे मंे पूछताछ करी हे, ओर 13 सितम्बर के उपचुनाव बाद जांच करा के कार्यवाही कराये खा भरोसा दओ हे।