खबर लहरिया ताजा खबरें का हो पाहे गांव में उजियारो

का हो पाहे गांव में उजियारो

taza ujiyara for webजिला महोबा, ब्लाक पनवाड़ी, गांव भुजपुरा। एते छह साल पेहले गांव के बाहर से बिजली निकरी हती। पे आज तक भुजपुरा गांव के भीतर बिजली नइयां। ईखी दरखास गांव के आदमियन ने कुलपहाड़ तहसील दिवस ओर प्रधान ने महोबा बिजली विभाग में दई हे। पे विभाग वाले बजट न होंय को बहाना कर हाथ में हाथ धरे बेठे हे।
गांव के मूलचन्द्र ओर श्रीपद ने बताओ कि छह साल पेहले दादरी गांव के लाने बिजली निकरी हती। पे हमाये ई गांव में बिजली नइयां। एसी गर्मी में हाल बेहाल हो जात हें। हमाये छोट-छोट बच्चा गर्मी से रोउत हे। मच्छर के काटें से बिमार हो जात हे। मनसुखा ने बताओ कि एक महीना में दो लीटर मिटटी के तेल मिलत हे ओऊ एक महीना खा नई पूजत हे। रात के अधियारे में निकरत हें तो गिर जात हे। एई से हम चाहत हें कि जभे हमाये गांव के बाहर से बिजली निकरी हे तो हमाये गांव में भी लग जाये तो नींक हो जाये। ईखे लाने हमने केऊ दइयां कुलपहाड़ तहसील दिवस में दरखास दई हे। पे हमाई गरीबन की कोनऊ सुनवाई नइयां। प्रधान गुडडो के आदमी जगतराज ने कहो कि मेंने एक साल पेहला महोबा बिजली विभाग में दरखास दई हती। जेई से भी केऊ दइयां कहो हे पे कोनऊ ध्यान नई देत हे।
पनवाड़ी बिजली विभाग के जेई अक्षय कुशवाहा ने कहो कि हमने ऊ गांव के लाने दो साल पेहले स्टीमेट बना के भेज दओ हतो। जेसई स्टीमेट पास होके बजट आ जेहे तो ऊ गांव में बिजली लगवा दई जेहे।