जिला चित्रकूट, ब्लाक कर्वी, कस्बा कर्वी। हिंया मानिकपुर का बस ठाड़ होय वाली जघा मा कांदौ भरा रहत हवै। यहिसे यात्रिन का कांदौ हइल के निकरै का परत हवै। छोट बच्चा तौ कांदौ मा गिर जात हवै। नाली बनवावै खातिर नगर पालिका विभाग मा 16 अगस्त का कहा गा , पै नाली नहीं बनी आय।
कस्बा के नीरज अउर राजेन्द्र का कहब हवै कि हम तौ या समस्या का दस साल से झेलित हन। यहिके खातिर नगर पालिका का कउनौ चिंता नहीं आय। अगर नाली बन जाये तौ हमार इं समस्या खतम होइ सकत हवै। नाली न बनै से बस भी तिरछी ठाढ़ हात हवै।
कर्वी नगर पालिका अधिशाषी अधिकारी लाल चंर्द सरोज का कहब हवै कि जेई संतोष कुमार से नाली बनवावैं खातिर कहा जई। अगर बजट होइ तौ नाली बनवा दीन जई। हंवा नाली बनब जरुरी हवै।