जिला चित्रकूट, ब्लाक मानिकपुर, गांव बघौड़ा अउर भौंरी का गेटा पुरवा। इं दूनौ गांव के प्राथमिक स्कूलन मा चोरी होइगे है। यहै से मास्टर अउर बच्चा परेशान हैं। चोरी के दरखास लिखाइगे अउर बेसिक शिक्षा विभाग मा भी कहा गा, पै कउनौ पता नहीं लाग। बेसिक शिक्षा अधिकारी महेन्द्र प्रताप सिंह का कहब है-“या बात तौ सही आय कि स्कूलन मा चोरी रोजै होत है। यहै से चित्रकूट जिला के एस.पी.कृष्ण बहादुर सिंह के साथ एक हफ्ता पहिले मीटिंग कीन गे है। चोरी करैं वालेन का पता कइके पकड़ा जई।”
बघौड़ा गांव के प्राथमिक स्कूल के कक्षा पांच मा पढ़ै वाली आरती, अंजली अउर नथिया का कहब है कि अपने घर से खाना खा के अइत हन, पै दुपहरी के फेर से भूंख लागत है। यहै से एक किलो मीटर दूर खाना खाये जाये का परत है। काहे से कि स्कूल मा 20 फरवरी 2013 का चोरी होइगे है। तौ खाना बनावै वाले बर्तन अउर सामान चोरी होइगा है। यहै से खाना नहीं बनत है। स्कूल के शिक्षा मित्र घनश्याम कहिस कि चोरी के लिखित बी.आर.सी. अउर बेसिक शिक्षा विभाग मा दीने हौं।