साल भर से भर रहे हैं फॉर्म, अभी तक नहीं बने महोबा ज़िले के बमरारा गाँव के लोगों के राशनकार्ड

जिला महोबा, गांव बमरारा में कछु आदमियन के पास राशनकार्ड नइया उनको आरोप हे के एक साल से हम ओरे राशन कार्ड के लाने फार्म भर रए लेकिन अबे तक बन के नइ आओ।
आशारानी ने बताई के हमाओ राशन कार्ड नइ बनो भोत परेशान हे। हमाय घर में कोऊ हे नईया सो कउ कितऊ खा लेत कउ कितऊ खा लेत। हमने प्रधान से भी कई सो बे कह रए ते के इते जाओ उते जाओ।
दसाराम ने बताई के हमाये घरे किसानी हे और दिल्ली पंजाब जाके के मजूरी करत। लेकिन हमाय भज्जा ने एक महीना पहले फार्म भरो तो लेकिन अबे तक राशनकार्ड नइ बनो उनको ऑनलाइन भी करवाओ।
राजकुमारी ने बताई के हमने तीन बार फार्म भरे लेकिन प्रधान नो जाओ सो कत के हमे नइया पतो।
कोटेदार जगमोहन ने बताई के जो फार्म भरे उनकी फीडिंग हो गई। लेकिन जो अपात्र हे उनके नइ भरे जिनके पास जमीन हे चार पहिया वाहन हे। बाकी सबके भरे अगर 95 प्रतिशत आ गओ तो कोऊ नई छूटे नई तो चार छह आदमी छूट जेहे।

रिपोर्टर- सरोज सेनी

Published on Jan 10, 2017