जिला महोबा,ब्लाक जैतपुर,गांव बिहार। इ गांव खे सड़क बेलाताल तक सात किलोमीटर दूरी हे। जीमें लगभग डेढ़ किलोमीटर की सड़क खराब हे। जीसे आएं जाएं वाले यात्रियन ओर आटो चलाएं वाले आदमियन खें परेशानी उठाउने परत हे।
एते के दशानन, खलक ओर भरत कुमार ने बताओ कि जा सड़क लगभग दस साल से खराब हे। जीमें गिलाव भरो रहत हे। हम अपने बच्चन खें आठवीं तक पढ़ा पाउत हें। आठवीं खें बाद बेलाताल जाने परत हे। जीसे निकरे में परेशानी उठाउने परत हे।
आटो चलाएं वाले डाªइवर सुरेन्द्र सिंह राजपूत ने बताओ कि इ सड़क में पांच आटो चलत हें। जा सड़क खराब होय से केऊ दइयां ओरतन खे अस्पताल ले जात समय रास्ता में डिलेवरी हो गई हे। प्रधान से केऊ दइयां कहो हे पे कोनऊ सुनवाई नई भई आय।
प्रधान किशन अहिरवार ने बताओ कि जा सड़क वन विभाग में आउत हें। सड़क बनवाएं के लाने केऊ दइयां पूर्व एस.डी.एम. खे दरखास दई हे, पे कोनऊ सुनवाई नइयां
वन विभाग के सर्वेक्षण अधिकारी राम नारायण ने बताओ कि जा सड़क संरक्षित वन भूमि में आउत हे। जोन विभाग जा सड़क बनवाउने चाहत हे तो भारत सरकार से अनुमति लेने परहे। जा सड़क बनवाएं की अनुमति हम नई दे सकत आय।