खबर लहरिया बुंदेलखंड समाजवादी पेंशन के लाने भटकत

समाजवादी पेंशन के लाने भटकत

17-06-15 Mahoba Kulpahad Samajwadi Pensionजिला महोबा, ब्लाक जैतपुर, कस्बा कुलपहाड़। एते के पचास ओरतन ने समाजवादी पेंशन खे लाने नगर पालिका ओर तहसील के चक्कर काटत हें। 12 जून खा समाज कल्याण विभाग ओर 16 जून खा तहसील दिवस में दरखास दई हे।

मोहल्ला गोविन्द नगर, वार्ड नम्बर सात लक्ष्मी, आशारानी, गुड्डो ओर क्रन्ती ने बताओ कि हम आदिवासी जाती के हे। हम झोपड़ी बना के रहत हे। हम लोग झाड़ू बेंच के परिवार चलाउत हे। जयदेवी, भूरी ओर सोनम कहत हे कि हमाओ फारम भरे ओर खाता खोलायें में छह सौ रूपइया लग गओ हे। आरोप हे कि हमाये साथ में भरे वाले फारम की पेंशन आ गई हे। नगर पंचायत कुलपहाड़ के चेयरमैन विमला को आदमी गोपीबाबू ने कहो अभे कछू आदमियन की पेंशन नई आई, जीमें 28 ओरतन के नाम पात्र सूची में हे। समाज कल्याण विभाग के अधिकारी रामसहांय राजपूत बताउत हे कि कुलपहाड़ कस्बा को लक्ष्य छह सौ अटठाइस हतो। छह सौ आदमियन की पेंशन खाता में चली गई हे। कछू आदमियन के खाता गलत हे, जीसे सही करायें जात हे। हमाये एते लक्ष्य से भी ज्यादा फारम जमा हे। सासन से लक्ष्य बढ़वाये की मांग करी हे। अगर लक्ष्य बढ़ जेहे तो कछू ओर आदमियन खा पेंशन मिलन लगहे।