खबर लहरिया चित्रकूट सब्जी मंडी के मांग

सब्जी मंडी के मांग

जिला चित्रकूट, ब्लाक मऊ,कस्बा मऊ। हिंया के मड़ई सब्जी मंडी के मांग मऊ एस. डी. एम. राम मूर्ति त्रिपाठी से करत हवै। काहे से कि कस्बा मा सब्जी मंडी नही आय।
कस्बा के कइयौ लोगन का कहब हवै कि सब्जी मंडी होब जरूरी हवै। हम सब्जी बेचैं वाले हिंया हुंवा सब्जी लगा के बेंचित हन। यहिसे दुकानदार लड़त हवै। सब्जी बेंच के अपने परिवार वालेन का पेट भरित हन। एक दिन सब्जी न बेंची तौ खाये के लाले पर जात हवैं। यहिसे सोचित हन कि अगर सब्जी मंडी बन जाये तौ हमार समस्या खतम होइ सकत हवै।
मऊ एस. डी. एम राममूर्ति त्रिपाठी कहिन कि सब्जी मंडी बनवावैं खातिर जघा नही मिलत आय। जइसेन जघा मिली तौ सब्जी मंडी बनवाई जई ।

रिपोर्टर – सहोद्रा देवी