खबर लहरिया चित्रकूट सड़क ऊंच होइ तबहिने बनी चरही

सड़क ऊंच होइ तबहिने बनी चरही

raja pur 18-7-13

बिना चरही के धंसत हैण्डपम्प

जिला चित्रकूट, ब्लाक रामनगर, कस्बा राजापुर। हिंया एक हैण्डपम्प लाग हवै। घन्टा भर चलावैं के बाद बूंद-बूंद पानी निकरत हवै। वहिमा चरही नहीं बनी आय या कारन वा धंसत हवै। यहै से मड़ई पियासे हिंया हुंआ भटकत हवै। या समस्या से रोज का हजारन मड़ई परेशान हवै । हैण्डपम्प के चरही बनावैं खातिर कइयौ दरकी टाउन एरिया मा कहा गा, पै कउनौ सुनवाई नहीं भे आय।
हिंया वार्ड नम्बर आठ के लवलेश, कमलेश, चुन्नू का कहब हवै कि राजापुर बस अड्डा जहां से मानिकपुर जाये का बस पकड़ै का होत हवै। हुंवा का हैण्डपम्प पानी बहुतै कम देत हवै। हैण्डपम्प के चरही नहीं बनी आय यहै से वा धंस गे हवै। हैण्डपम्प का डंडा बस देखात हवै। या समस्या से हजारन मड़ई परेशान होत हवै। कुछ मड़इन का कहब हवै कि यहिके खातिर टाउन एरिया मा कइयौ दरकी शिकायत कीन गे हवै, पै कुछ ध्यान नहीं दीन जात आय।
टाउन एरिया के चेयर मैन लक्ष्मी प्रसाद का कहब हवै कि वा हैण्डपम्प बीसन बरस पुरान आय यहै से धंस गा हवै। जबै सड़क ऊंच होइ तौ चरही दूसर बनवा दीन जई। तबहिने यहिकर मरम्मत होइ।