मइकी का पकड़े परिवार वाले
जिला बांदा, ब्लाक बड़ोखर खुर्द, गांव मटौंध। हेंया का पप्पू मटौंध थाना के चैकीदार दलित हीरालाल के मेहरिया मइकी कि साथै मारपीट करिस। एस.पी. अउर डी.एम. के हेंया 13 अगस्त 2013 का दरखास दें आये पै दरखास के बारे मा न एस.पी. के हेंया रिकार्ड आय अउर न डी.एम. के हेंया। कारवाही होब तौ बहुतै दूर के बात है।
मइकी के बिटिया मालती बतावत हैं-“मोर महतारी 3 अगस्त 2013 का मूंग निरावैं गे रहै तौ पप्पू सिंह ठाकुर के भैंस खेत मा घुस आई। भैंस का हांकै के बदौलत पप्पू सिंह गाली गलौज के साथै लाठी डण्डा से मारपीट करिस। इनतान मारिस है कि उठ बइठ नहीं पावत। गले से खाना पानी भीतर नहीं जात आय। टट्टी पेषाब करावैं चार चार जने पकड़ के लई जात है।”
मटौध थानाध्यक्ष राजीव यादव कहत हैै कि थाना मा रपट लिख गे है। दूसरे पक्ष का पकड़ै के कोशिश कीन जात है। कइयौ दरकी उनके घर भी जा चुके हैं। बलवन्त सिंह के बिटिया रश्मि सिंह कहत है कि लड़ाई के दिन से ही भाई पप्पू घर मा निहाय। एस.पी. उदय शंकर जायसवाल से बात भे। उंई कहिन शिकायत प्रकोष्ठ से पता करौ। होंआ पता कीन गा तौ मामला रजिस्टर न नहीं लिखे रहैं।