बस को करत इंतजार
जिला महोबा, ब्लाक चरखारी, कस्बा चरखारी। एते रैनपुर मोहल्ला टाकीज के एते प्राईवेट बस स्टैण्ड में दर्जनन आदमी बस को इन्तजार करत रहत हें, पे प्राईवेट बसे टेम से नई आउत आय। एईसे ऊ लोग रोड़वेज बस की मांग करत हे।
केशव, हन्ना, ओर राजू के साथे दस आदमियन ने बताओ कि एते तीन घन्टा से बेठे बस को इन्तजार करत हें, पे बस कभे तक आहें जा पता नइया । कोनऊ खा पनवाड़ी, कोनऊ खा राठ, तो कोनऊ खा गुढ़ा, गौरहरी जाने हे। एक घन्टा को सफर पूरे दिन को हो जात हे। काये से प्राईवेट बस वाले जभे तक धांस के सवारी नई भर लेत आय, तभे तक जायें को नाम नई लेत आय। जघा-जघा में ठाड़ी करत हे, तो ऊ अलग। एईसे हम चाहत हें कि जेसे चरखारी से खरेला ओर मुस्करा के लाने रोड़वेज बस चलत हे, ऊसई चरखारी से पनवाड़ी राठ के लाने बस चलन लगे तो नींक हो जेहे।
परिवहन विभाग के सहायक क्षेत्र प्रबन्धक एन.के सुमन ने बताओ कि चरखारी से पनवाड़ी रोड बोहतई सकरो हे। जीसे बरसात में बस फंसे को डर रहत हे। बरसात के बाद ऊ रोड में एक दो बस चलवा दई जेहे। जीसे यात्रियन का परेशानी न होहे।