खबर लहरिया चित्रकूट रास्ता बनैं खातिर दिहिन ज्ञापन

रास्ता बनैं खातिर दिहिन ज्ञापन

कबै बनी रास्ता

कबै बनी रास्ता

जिला चित्रकूट, ब्लाक मानिकपुर, गांव ऐचवारा, पुरवा बैना अउर लौघटा। इं दूनौ पुरवा से ऐंचवारा गांव जाये खातिर लगभग तीन किलो मीटर रास्ता खराब हवै। या समस्या लगभग तीस बरस से हवै। यहै से मड़ई रास्ता बनवावैं का कर्वी तहसील दिवस मा 16 सितम्बर 2014 का धरना धरिन अउर कर्वी एस.डी.एम. नरेन्द्र सिंह का ज्ञापन दिहिन।
लौघटा पुरवा के सुनीता, सतीलाल, राजेश अउर दिनेश का कहब हवै कि रास्ता नहीं बनी। रास्ता मा बड़े-बड़े गढ़वा हवैं। गढ़वन मा छोट बच्चा अउर बूढ़ मड़इन का डेर बना रहत हवै कि कत्तौ गिर न जाये। खराब रास्ता होय के कारन गर्मी मा धूल उड़त हवै अउर बरसात मा कांदौ भरा रहत हवै। या समस्या का रोज का लगभग दुइ हजार मड़ई झेलत हवैं। रास्ता बनवावैं खातिर प्रधान संदीप कुमार से चार बरस मा दसन दरकी कहे हन, पै वा नहीं ध्यान दिहिस। यहै से कर्वी तहसील दिवस मा धरना धरा अउर ज्ञापन दीन गा। प्रधान संदीप कुमार कहिस कि रास्ता बनवावैं खातिर बजट नहीं आय।
कर्वी एस.डी.एम. नरेन्द्र सिंह कहिन कि ज्ञापन लइ लीन गा हवै। जांच कइके रास्ता बनवाई जई।