खबर लहरिया ताजा खबरें राशन न मिलै पै करिन सड़क जाम

राशन न मिलै पै करिन सड़क जाम

taza copyजिला अम्बेडकर नगर, ब्लाक अकबरपुर गांव बनगांव। हिंआ दुई सौ कार्ड धारक हइन जेहमा से ज्यादा से ज्यादा मनई अमीर हईन। लकिन वे सब मनई का राशन बराबर मिलाथै। अउर जवन गरीब मनई हईन वे राशन मांगय जाथिन तौ वनके सबका गाली गलौज दैइके भगाय दियाथिन।
गांव कै सब मनई कइयो अधिकारी का अप्लीकेशन दिहिन लकिन कउनौ सुनवाई गरीबन कै नाय भै। 18 मार्च का गांव कै सब मनई इकट्ठा होइके एस.डी. एम. से शिकायत करय गईन तौ एस. डी. एम. नाय मिलिन। अधिकारिन के न मिलै पै सब मनई सड़क पै जाम लगाय दिहिन। थोड़ी देर मा पूरा शहर जाम होय गै। सूचना पै पुलिस तुरन्त जाम हटवाइन। अउर प्रधान समेत आठ जने का कोतवाली लै जाय कै बंद कै दिहिन। तब गांव कै मनई जाइके कोतवाली कै घेराव करिन।
कोटेदार सुनील बताइन की जब चार सौ तीस मनई कै राशन आवाथै तौ हम छः सौ चालीस मनई का राशन कहां से दै पाउब। प्रधान पंकज बताइन की छह सौ तैतालिस मनई कै आंनलांइन फार्म भरा गै बाय। जेहमा सब मनई राशन पावै के पात्र हईन। जवन बड़ा मनई राशन पावत रहिन उनकै नाम कटिगै बाय तौ जवन पात्र मनई हइन। उनका सबका राशन मिलै का चाही।
अकबरपुर कोतवाली कै कोतवाल महेन्द्र प्रताप सिंह बताइन कि शान्तिभंग कै धारा 151, 107, आई.पी.सी. लाग बाय। आठ मनई कै चालान कीनगै बाय।