खबर लहरिया बुंदेलखंड मार के कर दओ घायल

मार के कर दओ घायल

एस.पी.कार्यालय में महेश

एस.पी.कार्यालय में महेश

जिला महोबा, ब्लाक चरखारी, गांव चन्दौली। एते के हलकुट्टा पुत्र बाबूराम के साथे भागीरथ, मुन्ना ओर मुरलीधर पुत्र बालादीन ने 27 अक्टूबर 2014 खा मारपीट करी हती। जीखी दरखास हलकुट्टा ने 30 अक्टूबर खा खरेला थाना में दई हती, पे रिपोर्ट नई लिखी गई हती। दुबारा से 3 दिसम्बर खा खरेला थाना में दरखास दई हे।
हलकुट्टा ने बताओ कि 27 अक्टूबर खा में सौदा लेके अपने घरे जात हतो। तभई भागीरथ, मुन्ना ओर मुरलीधर मोये छेंक के गाली-गलौज करन लगे। मना करे पे हाथ में लये लाठी ओर डन्डा से मारन लगे। जीसे मोये कन्धा ओर हाथ में बोहतई गम्भीर चोटे आई हें। खरेला थाना में दरखास देय खे बाद भी रिपोर्ट नई लिखी गई हे।
खरेला थाना के मुंशी राजकिशोर सिंह सेंगर ने बताओ कि धारा 325 (गम्भीर चोट आना) 323 (मारपीट) 506 आई.पी.सी. (जान से मारने की धमकी) के तहत तीनऊ के खिलाफ मुकदमा लिख गओ हे। अभे ऊ फरार हें।
भागीरथ के परिवार में ई केस के बारे में बात करी तो ऊखे परिवार वालेन ने कछू भी बताये से मना करो हे।
एसई ब्लाक कबरई, गांव रतौली, एते के महेश पुत्र शिवपाल ने बताओ कि 1 अक्टूबर 2014 खा जगदीश, कृपाल, पट्टू हीरा रमेश्वर के साथे गांव के खिलावन मनोज ओर ऊखो बाप जागे ने मार पीट करी करी हती। जीसे मोई खोपड़ी फट गई ओर हाथ टूट गओ हतो। जीखी रिपोर्ट लिखाउन गओ पे मोई रिपोर्ट नई लिखी हे। ईखी दरखास मेंने 8 दिसम्बर 2014 खा एस.पी. खा दई हे ओर रिपोर्ट लिखे कारवाही की मांग करी हे।
पट्टू ने कहो कि हमाई कोनऊ लड़ाई नई हे। ऊ झूठ दरखास दई हे। जभे कि ओते हते भी नई। ऊखी लड़ाई जागे के साथे भई हे। महोबा कोतवाली के एस.आई. महेन्द्र सिंह भदौरिया ने बताओ कि ऊखो मुकदमा लिख गओ हे। ऊमें चार सीट भी लग गई हे। दोनऊ को मुकदमा न्यायालय में होहे। ऊ फालतू परेशान होत हे।