मच्छरन के कारन आदमी परेशान

जिला महोबा, ब्लाक जैतपुर, कस्बा बेलाताल। डी.डी.टी के छिड़काओ न होंय के कारन बोहतई मक्ष्छर बढ़े हे। जीसे शाम होतई आदमी परेशान हो जात हे। अस्पताल में मरीज नई बनत हे।
कस्बा को हरीशंकर कहत हे की मोई दो बहू हे। जोन दोनऊ एक हफता से बिमार हे डाक्टर ने मलेरिया की बिमारी बताई हे। मच्छर रात दिन हमाओ जिन्दा रहें मुश्किल करें हे। कृष्णकुमार कहत हें की मच्छरन के कारन कोनऊ समान खरीदन तक नईं आउत हे। जीसे धन्धा पानी बन्द परो हे। एक दिन में तीन रुपइया की मोटीन जलाउत हे। मगरौल गांव की सीमा कहत हे की पांच दिन से जाड़ा देके बुखार आउत हे। हम गरीब आदमी खायें खे तो जुगाड़ नईं पाउत हे तो मोटिन जा फिर कण्डा किते से लाहे। खिरिया गांव की हीराबाई कहत हे की मच्छर झुण्ड को झुण्ड लगत हे। ईखे लाने कोनऊ नईं ध्यान देत हे। जभे बिमार हो जात हे तो अधिकारियन की आखे खुलत हे।
बेलाताल प्राथमिक स्वास्थ्य केन्द्र को डाक्टर पी.के. सिंह कहत हे की एक महीना से बराबर गांवन में डी.डी.टी दवाई को छिड़काओ कराओ जात हे। जोन गांव से ज्यादा मलेरिया के बिमार आदमी आउत हे। ओते दवाई हो छिड़काओ कराओ जात हे।