जिला बांदा, ब्लाक महुआ, ग्राम पंचायत ऐला, मजरा मूंगुस पुरवा। 1 मई का समाजवादी सूखा राहत सामग्री किट पैकेट लें जात समय गांव अउर ग्राम पंचायत के बीच रास्ता मा दलित नत्थू पानी पी के बेहोश होइगा। वहिका जब तक इलाज खातिर अस्पताल लई जावा गा। महुआ प्राथमिक स्वस्थ्य केन्द्र के डाक्टर मृत घोषित कइ दिहिन हैं।
नत्थू के औरत मुन्नी बताइस कि हमरे घर मा चार दिन से खाय खातिर अनाज का एक दाना न रहै। 4 लड़का अउर दुई लड़की हैं। दूनौ लड़का सूरत शहर मा आइसक्रीम का काम करत हैं। उनके उमर 15 अउर 17 साल है उंई दूनौ या साल बाहर गें हैं।
गांव के शिवप्रसाद अउर भाई भगवानदीन बतावत हैं कि वहिके पास रहै का खुद का घर तक निहाय। चाचा के जमीन मा घर बना के रहत है। बस अन्त्योदय का राशन कार्ड बना है। पूरा गांव या बात कहत है कि भुखमरी से नत्थू के मउत भे है। प्रसाशन अउर पार्टी के लोग भी रोज आवत हैं। जब मुख्यमंत्री भुखमरी से मउत मान के 5 लाख रूपिया मुआवजा दें का ऐलान करिस है। साथै कारवाही भी करिस है। जेहिमा लेखपाल अउर सचिव सस्पेंट कइ दीन गे हैं। नरैनी एसडीएम. अउर डी.एम. के ऊपर भी कारवाही होई सकत है। काहे से कि गांव के लोगन अउर मुन्नी के हिसाब से नरैनी एस.डी.एम. बगैर पोस्ट मार्टम के नत्थू का अंतिम संस्कार कराइस है। जेहिसे कि भुखमरी न साबित होई सकै। 7 मई का जब खबर लहरिया पत्रकार गे रहैं तौ नत्थू के औरत अउर गांव के लोग बताइन कि 6 मई का बसपा पार्टी के नसीमुद्दीन सिद्दीकी आय रहैं। उंई 3 लाख रूपिया दिहिन हैं। 50-50 हजार लड़कियन खातिर अउर दुई लाख घर खर्च का। नरैनी एस.ड़ीएम. 10 हजार दिहिन हैं, डी.एम. के हेंया से एक साइकिल अउर ब्लाक से सौर्य उर्जा का लामटेन मिला है।
कांग्रेस विधायक दलजीत सिंह कहिन कि या घर मा खर्चा खातिर पूरे राशन पानी के व्यवस्था करैं खातिर कहिस। मुख्यमंत्री लखनऊ बोलाईन है, पै डेट अबै पता निहाय।
नरैनी एस.डीएम. महेन्द्र सिंह से बात करैं के कोशिश कीन गे, पै बात करैं से मना कइ दिहिस कि बहुतै देर होई चुकी है। मैं कुछ नहीं बता सकतेंव।
रिपोर्टर – गीता