खबर लहरिया चित्रकूट बेकसूर करिन मारपीट

बेकसूर करिन मारपीट

खियाली

खियाली

जिला चित्रकूट, ब्लाक मऊ, गांव मनका। हिंया का रहैं वाला खियाली नाम का मड़ई आपन भइंस चरावैं खातिर डोडि़या माफी गांव के पुरवा छतैनी मा 4 अप्रैल 2014 का गा रहैं। वा पुरवा के मंगल अउर हीरालाल इं दूनौ मिलके वहिका मारिन हवैं। यहै से खियाली बेहोश होइगा। यहिके दरखास बरगढ़ थाना मा लिखाइगे। पुलिस खियाली का इलाज खातिर कर्वी भेजिस।
गांव के खियाली का कहब हवै कि अपने छतैनी पुरवा के जमीन मा भइंस चरावत रहौं। पता नहीं मोहिका बिना कसूर के मंगल अउर हीरालाल मिल के लाठी डंडा से मोहिका मारिन। मोर खपरी फाटगे अउर खून बहै लाग। ज्यादा खून बहैं से मैं बेहोश होइ गयेंव। उंई मोहिका बिना बात के मारिन अउर लड़ाई करिन। पता नहीं काहे इनतान करिन हवैं। मंगल अउर हीरालाल का कहब हवै कि हमरे जमीन मा भइंस चरावत रहै। मना कीने हन तौ वा गाली देत रहै। यहै से लड़ाई बढ़गे हवै।
बरगढ़ थाना के इस्पेक्टर राजाराम द्विवेदी का कहब हवै कि मंगल अउर हीरालाल के खिलाफ मुकदमा लिख लीन गा हवै। खियाली का इलाज करावा जई।