बिजली कटौती, ओर वोल्टेज कम से परेशान

जिला महोबा, ब्लाक जैतपुर, कुलपहाड़ ग्रामीण गहरा पहाडि़या। एते एक साल से बिजली कटौती ओर वोल्टेज कम आउत हे। जीसे आदमी परेशान हे, साथे लड़का बिटिया की पढ़ाई नई हो पाउत हे। जीसे लड़का बिजली विभाग में हंगामा कर टोर फोर करें की बात कहत हे।
योगेन्द्र कुमार, कुंवरलाल ओर श्याम बताउत हे कि हम कनेक्सन धारक हे। हमने अपने पढ़ाई खा कनेक्सन लओ हतो। वोल्टेज कम होंय से बल्ब के तार भर नई जला पाउत हे। कभऊं-कभऊं तो दो-दो दिन बिजली नई आउत हे। रामकुमार ने कहो कि बिजली शाम 4 बजे से 7 बजे तक राहत हे, जभे पढ़ाई को ओर काम को समय होत हे तो बिजली चली जात हे। जीसे न पढ़ाई हो पाउत हे ओर न काम। कोटा में तेल भी तीन लीटर मिलत हे जोन पूरे महिना खा नई पूजत हे। दीपिका, जयश्री ओर पूजा कहत हे कि हमाई बोर्ड की परीक्षा 19 फरवरी से हे, हम रात मे लालटेन ओर डिब्बी जला के पढ़त हे। पढ़ाई नई हो पाउत हे। रात दिन सोचत हे कि अगर फेल हो जेहे तो हमें मताई बाप दुबारा से न पढ़ाहे।
महोबा बिजली विभाग के अधिशाषी अभियन्ता नेकीराम ने बताओ कि नौ घण्टा बिजली काटे को आदेश ऊपर से हे। अगर वोल्टेज कम आउत हे, तो आदमी पास के बिजली विभाग में सूचना देय तो कर्मचारियन खा भेज के सही कराओ जेहे।