बाँदा की एकता मिश्र संपत्ति के लिए विभागों में भटकती रही

जिला बांदा, शहर बांदा 20 सितम्बर का एकता मिश्रा आपन छोट के बिटिया का लइके आत्महत्या करै के कोशिश करिस। काहे से ससुराल वाले वहिका घर से निकाल दिहिन रहै।
अधिकारी मौका मा आके नियाव देवावै का कहिन हवै। या घटना बांदा जिला के आय।
एकता मिश्रा का कहब हवै कि चार साल पहिले मोर शादी दिसम्बर 2012 मा भे रहैं। नवम्बर 2014 मा मोर मनसवा आत्महत्या कर लिहिस रहै।
तबै देवर अउर सास मिल के मोहिका घर से निकाल दिहिन। अउर सबै संपत्ति अपने नाम कई लिहिन हवै।
नियाव खातिर अधिकारिन के चक्कर लगावत हौं। अधिकारी कहत रहै या घर का मामला आय, अउर मोर सुनवाई नहीं करत रहैं।
जबै एक महीना से चक्कर लगावत लगावत परेशान होइ गइंव तौ मिट्टी का तेल डाल के आत्महत्या के कोशिश कीने हौं पैं मौका मा पुलिस आ गे अउर उंई मोहिका जान दे से रोक लिहिन हैं।
एकता के महतारी का कहब है कि जबै कउनौ रास्ता नही मिला तौ एकता आत्महत्या के कोशिस करिस हवै।
सिटी मजिस्ट्रेट योगेश कुमार बताइन कि मेहरिया का आत्महत्या करें से रोका गा है। ससुराल वालेन के खिलाफ कानूनी कारवाही कीन जई।

रिपोर्टर- मीरा देवी