बस्ती मा प्रधान झाकैं तक नहीं आवत

जिला चित्रकूट, ब्लाक कर्वी, गांव गोण्ड़ा, फकीरन बस्ती। हिंया नाली अउर रास्ता नहीं बना आय। या समस्या से लगभग पैंतिस घर के मड़ई जूझत हवैं। नाली अउर रास्ता बनवावैं खातिर प्रधान राजकरन सिंह पटेल से 1 मार्च का मांग कीन गे, पै समस्या जस के तस बनी हवै।
बस्ती के जलीसा, रईसा अउर इमामुननिशा का कहब हवै कि प्रधान हमरे बस्ती मा कत्तौ झांकै तक नहीं आवत हवैं। नाली अउर रास्ता न बनी होय से निकरैं मा परेशानी होत हवै। पूर रास्ता मा कांदौ बजबजात हवै। मड़ई चबूतरा से चढ़ के निकरैं का मजबूर हवै। यहिनतान शिवपूजन कहिस कि अपने लड़की के शादी करैं का हवै। रास्ता मा इनतान का कांदौं भरा हवै। मोरे येत्ता रुपिया नहीं आय कि कत्तौं मैरिज हाल से लड़की के शादी कइ सकौ। प्रधान गरीबन के समस्या का कउनौ ध्यान नहीं देत। प्रधान राजकरन सिंह पटेल कहिस कि मड़ई नाली अउर रास्ता नहीं बनवावैं देत हवंै। मैं तौ पूर कोशिश करत हौं कि नाली अउर रास्ता बन जाये। कर्वी ब्लाक के ए.डी.ओ. सुखलाल कहिन ंिक नाली अउर रास्ता बनवावैं खातिर बजट नहीं आय। सरकार कइती से बजट अई तौ नाली रास्ता बनवाई जई।