खबर लहरिया औरतें काम पर बलात्कार करे खे बाद खवा दओ जहर

बलात्कार करे खे बाद खवा दओ जहर

 

अस्पताल में बिटिया खा परिवार

अस्पताल में बिटिया खा परिवार

जिला महोबा, ब्लाक चरखारी। कोतवाली क्षेत्र की एक ओरत ने बताओ कि टिलुआपुरा मोहल्ला के सूर्यमनी ने मोये बिटिया के साथे बलात्कार करो हे। बाद में मोये बिटिया खा जहर खवा दओ हे। जीसे 26 अप्रैल 2014 खा बिटिया की मोत हो गई हे। ईखी रिपोर्ट चरखारी कोतवाली में लिखाई हे।
बिटिया की मताई ने बताओ कि में कृषि विभाग में चतुर्थ श्रेणी में काम करत हों। में सुबेरे से आफिस चली जात हती। घर में कोनऊ न हतो। घर सूनो जान के सूर्यमनी घर में घुस आओ ओर मोई बिटिया के हाथ-पांव बांध के मुंह में कपड़ा ठूस दओ ओर बलात्कार करो। जभे में आफिस से घरे आई तो दरवाजा खोले खे लाने बिटिया खा आवाज दई। तभई सूर्यमनी घर से निकर के मोटर साइकिल से भाग गओ। भीतर बिटिया बेहोश परी हती। ऊखे गले ओर हाथन-पांवन में नाखून के निशान हते। बिटिया खा लेके चरखारी अस्पताल गये तो ओते से महोबा खा रिफर कर दओ। ओते रात भर दवाई भई ओर सुबह पांच बजे ऊखी मोत हो गई। हमखा चरखारी में डाक्टर ने बताओ हतो कि बिटिया ने जहर खाओ हे। ऊखी मताई को आरोप हे कि सूर्यमनी ने बलात्कार करक खे बाद बिटिया खा जहर खवा दओ हे। पुलिस ने लाश को पंचनामा भर पोस्टमार्डम खा भेज दओ हे। ईखी सूचना चरखारी कोतवाली में लिखाइ हे। चरखारी कोतवाली के प्रभारी आर.एस.एस. तिवारी ने बताओ कि ऊखो मुकदमा धारा 376 (बलात्कार) 306 (आत्महत्या के लिये प्ररित करना) के तहत लिख गओ हे। सूर्यमनी फरार हे ऊखे पकरे की कोशिश करी जात हे। ई केस की छानबीन सी.ओ. करत हें।