बम से गांव मा दहषत

जिला चित्रकूट, ब्लाक कर्वी,गांव कर्वी माफी चमड़ामण्डी। हिंया 12 सितंबर का रामबाबू के घर मा ठाढ़ टैम्पो मा बच्चा खेलत रहैं। एक बच्चा खिलौना उठा लिहिस। वा बम रहै। बम फटै से दुइ बच्चा घायल होइगे । घटना के सूचना मिलै मा एस.पी.,कर्वी विधायक वीर सिंह पहुंच गें। घायल बच्चन का इलाहाबाद मा भर्ती कीन गा।
सरोज का कहब हवै कि या टैम्पो मकान मालिक के हवै। वा लगभग आठ महीना से ठाढ़ हवै। रोज के जइसे बच्चा टैम्पो मा बइठे खेलत रहै। अंकित खिलौना समझ के उठा लिहिस। वा बम रहै। यहिसे वहिके दूनौ हथेली उड़गे अउर नितिन के माथे का मास निकर गा। पास मा ठाढ अभिषेेक भी झुलस गा। पता नही लागत कि या बम हिंया कउन राखिस हवै। अब तौ गांव मा बहुतै डेर लागत हवै। अपने बच्चन का खेलै खातिर बाहर नहीं जाये देत हन। कर्वी कोतवाली के मुंशी कहिन कि जांच चलत हवै। पुलिस पता लगावै मा लाग हवै कि या बम कहां से आवा हवै।