खबर लहरिया बुंदेलखंड प्रधानाचार्य ने करी मारपीट

प्रधानाचार्य ने करी मारपीट

अशोक कुमार ओर हर्ष

अशोक कुमार ओर हर्ष

जिला महोबा, ब्लाक कबरई, कस्बा कबरई विवेक नगर। एते के अशोक कुमार गुप्ता को लड़का हर्ष महोबा के सन्त जोसफस स्कूल के कक्षा 7 में पढ़त हतो। 5 मई 2014 खा स्कूल के हेडमास्टर ने हर्ष खा चूरन की पुडि़या खा गुटका समझ के बोहतई मारों हे। ईखी रिपोर्ट अशोक कुमार ने महोबा कोतवाली में लिखाई हे।
हर्ष के बाप अशोक कुमार गुप्ता ने बताओ कि मोओ लड़का ऊ स्कूल में कक्षा शिशु से पढ़त हे। स्कूल के मास्टरन ने हर्ष खा कभऊं नई मारो हे। रोज के जेसे 5 मई 2014 खा हर्ष स्कूल गओ, छुटटी के बाद हर्ष स्कूल के बाहर चूरन खात हतो। तभई होमगार्ड हर्ष खा पकर के हेडमास्टर के एते ले गओ। हेडमास्टर ने न कछू देखो ओर न कछू सुनो हर्ष खा डण्डी से मारन लगो। हर्ष के शरीर में बोहतई डण्डी के निशान हे। हेडमास्टर ने केऊ लड़का बिटियन खा मारो हे, पे कोनऊ ने कछू नई कहो हे। हर्ष की हालत देख के हमने महोबा कोतवाली में रिपोर्ट लिखाई हे।
सन्त जोसफस स्कूल के हेडमास्टर से बात करने की कोशिश करी हे, पे न मिल पायें से बात नई हो पाई हे। फोन से बात की तो बात करें से मना कर दओ।
महोबा कोतवाली के एस.ओ. धरमराम ने बताओ कि ऊखो मुकदमा 323 (मारपीट) के तहत लिख गओ हे। जांच के बाद कारवाही करी जेहे।