खबर लहरिया औरतें काम पर पुलिस लिखिस बलात्कार का मुकदमा

पुलिस लिखिस बलात्कार का मुकदमा

जिला बांदा, थाना बबेरू क्षेत्र। हेंया के एक गांव मा सोलह साल के दलित लड़की के साथै बलात्कार का मामला सउहें आवा है। या घटना 24 मार्च सुबेरे आठ बजे के आय। बबेरू कोतवाली मा रपट लिखाइन हैं।
लड़की बताइस-“मैं आपन बाड़ा मा कण्डा पाथैं गईंव। जइसे भीतर घुस गईंव तौ पीछे से कोऊ मुंह दबा लीन। मैं कउनौतान मुड़ पाईंव तौ विनोद उर्फ अट्टू रहै। वा मोर कपड़ा फाड़ डालिस। चेहरा मा नोच लिहिस अउर बलात्कार करिस। चिल्लाय के आवाज सुन के मोहल्ला के मड़ई आ के मोर जान बचाइन। मैं बाबा के साथै कोतवाली आईंव तौ पुलिस बेमलतब के सवाल पूछिस।”
लड़की का बाबा बताइस कि लड़की के महतारी यहिके बचपन मा ही मर चुकी है। बाप परदेश मा कमात है। अगर कउनौ औरत लड़की के साथै थाना जात अउर घटना बतावत तौ लड़की का सहारा होत। बबेरू कोतवाली के मुंशी उमाकान्त गौतम कहिन कि विनोद उर्फ अट्टू के खिलाफ धारा 452 (घर मा घुसब) 334 (अंगन का दांत से काटब) 376 (बलात्कार) 506 (जान से मारैं के धमकी) लाग हैं। विनोद उर्फ अट्टू फरार है। पुलिस वहिका ढूढ़ै खातिर कोशिश मा लाग है।