पुलिस नहीं करत कारवाही

जिला चित्रकूट, ब्लाक पहाड़ी, कस्बा पहाड़ी। हिंया के एक औरत का आरोप हवै कि 25 जनवरी का मोर लड़की का पिंटू सिंह अपने साथै फुसला के लइगा हवै। मोर लड़की घर मा अकेले रही हवै। यहिके रपट राजापुर थाना मा 30 जनवरी का लिखावैं के बादौ कउनौ सुनवाई नहीं भे आय।
गांव के एक औरत का कहब हवै कि वा दिन लड़की घर मा अकेले रही हवै। हम लोग काम से खेत मा चले गये रहेन। जबै घर आय तौ देखा कि लड़की घर मा नहीं हवै। लड़की का रिश्तेदारन के हिंया पता करेंव, पै वहिका कउनौ पता नहीं लाग। जबै लड़की का पता करत करत परेशान होइ गयेंव तौ पता लाग कि लड़की का फुसला के पिंटू सिंह लइगा हवै। काहे से कि पिंटू सिंह का भी कउनौ पता नहीं लाग हवै। वा भी लापता होइगा हवै। या कारन से पिंटू सिंह के खिलाफ राजापुर थाना मा रपट लिखाये हौं, पै पुलिस वहिका कउनौ पता नहीं लगाइस हवै। पता नहीं कि मोर लड़की कहां अउर कउन हाल मा होइ। लड़की के याद मा रात के नींद नहीं आवत हवै।
राजापुर थाना के बड़े दरोगा आर. बी. सिंह से या मामला का लइके बात कीन गे। उंई कहिन कि ंिपटू सिंह के खिलाफ रपट लिख लीन गे हवै। वहिका पकड़ के जेल भेजा जई।