पास होइगा बजट, अब नाली बनी

जिला चित्रकूट, ब्लाक कर्वी, कस्बा शिवरामपुर, रेलवे स्टेशन रोड। हिंया लगभग साठ मीटर नाली नहीं बनी हवैं। या समस्या सैकड़न बरस से हवै। यहै कारन से लगभग सौ मड़ई या समस्या से जूझत हवैं। नाली बनवावैं खातिर कइयौ दरकी प्रधान शिवबरन कपडि़या से कहा गा, पै वा नहीं सुनत आय।
या समस्या का लइके प्रधान शिवबरन कपडि़या से बात कीन गे। वहिकर कहब हवै कि नाली बनवावैं खातिर लगभग साढ़े तीन लाख रूपियाा का बजट पास होइगा हवै। नाली बनवाई जई।
कस्बा के भइयादीन अउर शिवकलिया का कहब हवै कि नाली नहीं बनी। या कारन दुकान के सउहें पानी भरा रहत हवै। बरसात का पानी भरा होय के कारन ग्राहक दुकान मा सामान खरीदैं नहीं आवत हवै। अगर हमार दुकान न चली तौ हमार परिवार के खर्चा कसत चली। कमाये कमाये तौ पूर नहीं परत हवै। या कारन से नाली बनवावैं खातिर कइयौ दरकी प्रधान से कहे हन, पै वा ध्यान नहीं देत हवै। हिंया के नाली बनब बहुतै जरुरी हवै। नाली बन जाये तौ सही रहै। कर्वी सहायक खण्ड विकास अधिकारी सुखलाल कहिन कि प्रधान से जल्दी से जल्दी नाली बनवावैं खातिर कहा जई।