कभे बनहे नाला
महोबा शहर, रोडवेज के बगल में। एते छह महीना से लगभग सौ मीटर को नाला खुदो परो हे। जीमें आय दिन घटना होत हे, पे नगर पालिका के कर्मचारी कोनऊ ध्यान नई देत आय।
रोडवेज के बगल की दुकानदार गायत्री ने बताओ कि जा नाला बरसात में खुदो हतो। तभई से एसई परो हे। डेढ़ महीना पेहले एक गाड़ी गिर गई हती। जीसे के्रन मशीन खा बुला के निकारो हतो। इमामबक्स ने बताओ कि एक महीना पेहले नाला में एक गाय गिर के मर गई हती। प्राइवेट बस स्टैण्ड खा हजार साधन आउत जात हें। जीसे आदमी पैदल नई निकर पाउत हे। एक आदमी की अनाज की बोरी गिर गई हती। एसी तो आय दिन घटना होत हे। जभे गाय गिरी हती। तभई नगर पालिका में सूचना दई हती, पे कोनऊ नई आओ हे। अगर जा नाला न बनहे तो बड़ी घटना होय को डर हे। नाला बनवाये के लाने केऊ दइयां नगर पालिका में कहो हे, पे नगर पालिका वाले कोनऊ सुनवाई नई करत आय।
चेयरमेन पुष्पा अनुरागी ने बताओ कि बस स्टैण्ड के पछाऊं को पानी निकारे खे लाने नाला खुदवाओ हतो। अभे ऊखो टेण्डर पास नई भओ हे। एई से नाला एसई परो हे। टेण्डर पास होय के बाद जल्दी ही ऊ नाला में काम शुरू करा दओ जेहे।