नहीं मिलत खाना नाश्ता

जिला चित्रकूट,ब्लाक रामनगर, गांव देऊंघा, पुरवा ककरौली, लोधौरा बरेठी, छीबों अउर बांधी। इं गांव के औरतै कहिन कि 27 अउर 28 अप्रैल का रामनगर प्राथमिक स्वास्थ्य केन्द्र मा पलंग के चादर गंदे अउर बच्चा पैदा करावैं वाली औरतन का नाश्ता नहीं दीन जात हवै।
गांव देऊंधा पुरवा, ककरौली के रानी अउर लोधौरा बरेठी गांव के सुमन का कहब हवै कि हम लोग 27 अप्रैल का बच्चा पैदा करावै आय रहेन। रामनगर प्राथमिक स्वास्थ्य केन्द्र मा पलंग के चादर गंदे रहत हवंै। औरतन का सुबेरे नाश्ता अउर दुपहरी का खाना नहीं मिला। यहै से अपने घर से चादर,नाश्ता अउर खाना मंगवावै का परा। अगर सरकार हरतान के सुविधा दीने हवै तौ उंई सुविधा अस्पताल वाले काहे नहीं देत।
गांव छीबों के उर्मिला अउर बांधी गांव के प्रियंका का कहब हवै कि अपने घर से नाश्ता मंगवावै मा समय लाग। यहै से देर से नाश्ता कीने रहेन। फेर दुपहरी के अपने परिवार वालेन का खाना लें खातिर घर भेजेन। रामनगर प्राथमिक स्वास्थ्य केन्द्र मा बहुतै गंदगी रहत हवै।
रामनगर प्राथमिक स्वास्थ्य केन्द्र के प्रभारी नरेन्द्र कुमार कुरैचिया कहिन कि खाना बनावै वाले का बदलै के जरूरत हवै। वा खाना बनावै मा लापरवाही करत हवै।