जिला चित्रकूट, ब्लाक रामनगर अउर कर्वी, कस्बा अउर राजापुर बढ़त फैशन के दौर मा शहर मा नहीं गांव मा भी मड़ई पीछे नहीं आहीं। गांव के दुकान मा भी समरकोट से लइके नये डिज़ाइन के लहंगा चुनरी बिकत देखाई पड़त हवै।
राजापुर के दुकानदार पंकज केसरवानी का कहब हवै कि मौसम के हिसाब से पहिले कपड़ा बिकत रहै पै अब तौ बारों महीना मोदी सूट अउर समरकोट जइसे कपड़ा बिकत हवै। मोर दुकान मा नये फैशन के कपड़ा बाबासूट, गाउन सूट, मोदी सूट सब बिकत हवै।
कर्वी के टेलर सुनीता बताइस कि पहिले मेहरिया हाफ बांह का ब्लाउज पहिनत रहै अब फुल बाह का नेट का कपड़ा लगा के नये फैशन का पहिनत हवैं। शहर मा मेहरिया धूप से बचे खातिर पहिनत हवै अब गांव मा फैशन के कारन पहिनत हवै। एक साल से इनतान का फैशन बहुतै चला हवै।
कर्वी के चित्रादेवी बताइस कि समरकोट पहिने से गर्मी मा आराम मिलत हवै। शरीर ढका रहत हवै पसीना नहीं निकलत आय। शरीर का आराम मिलत हवै। समरकोट गर्मी से बचावत हवै। हुंवा नई दुलहिन का पसंद आवत हवै नये डिज़ाइन के लहंगा चोली।
रिपोर्टर- सहोद्रा
29/05/2017 को प्रकाशित
